Carnaval

Fieësweekend KV d’n Uul van den Grauwert


In ’t weekend van 19 en 20 jannewarie vintj weer ’t jaorliks fieësweekend van KV d’n Uul van den Grauwert plaats. Sporthal de Koeweide zal weer omgeboewdj waere toet groeat fieëspaviljoen veure Moferter Aovendj enne receptie van Prins Mario I en Prinses Dayen.

Zaoterdig 19 jannewarie: MOFERTER AOVENDJ
Netuurlijk höbbe v’r weer oos bès gedaon om veur uch ‘ne sjoeane en gezellige Moferter Aovendj te verzorge. Wie de lèste jaore gebroekelijk, steit ’t ieëste deil vanne aovendj in ’t teike van kolder. Maar leefs 4 buuttereedners staon veur uch inne buut, en neet de minste: Hub Stassen, Gilbert Petit, Har Daniels en Henrie van Geneijgen. Natuurlijk zalle d’r tussendoor ouch nag optraejes zeen van “lokaal” artieste. ‘t 2e deil vanne aovendj steit in ’t teike van Limburgse vastelaovesmeziek. Ouch in dees categorie höbbe v’r ’n deil bekindje artieste weite te strikke. Waat dach geer van Don Kiesjot en Christel & Quinn (veurhaer W-Dreej)! Ouch Andy & Roy en Demi-Sec zalle häör opwachting make. En esof det nag neet genog is, zal Marleen Rutten deze geweldige aovendj op ’n passende meneer aafsloete! Entreekaarte zeen te koup bie de EMTE, Biej de Vogel en bie de leeje vanne raod van èllef. De zaal is aope vanaaf 19:00 oere, aanvank van ’t program is om 20:00 oer. Haopelijk treffe v’r ós 19 jannewarie inne sporthal!

Zondig 20 jannewarie: RECEPTIE PRINS MARIO I & PRINSES DAYEN
Op zóndig 20 jannewarie vintj de receptie plaats van oos prinsepaar Prins Mario I & Prinses Dayen. Zie regere ’t kómmendj vastelaovessezoen ónger häöre spreuk: “Mit hamer en zaeg, gaeve v’r ‘m ’n vaeg!”, same mit häör adjudante William Roijakkers, Steffan Sackers en Roger Ticheler. Daonaeve kintj g’r oppe receptie ouch oos jubilarisse felicitere, te weite: Fred Hawinkels (3x11 jaor lid), Johnny van Pol (1x11 jaor lid) en Roger Ticheler (1x11 jaor lid). De receptie begintj óm 13:11 oere en zal doere toet ongevieër 19:11 oere. Veer nuuedige uch allemaol belaef oet om ’n hendje te komme sjödde.
|Doorsturen